അഗതിമന്ദിരത്തിലെ അമ്മ
താരാട്ടു പാട്ടിന്‍ മാധുര്യവും
തളത്തില്‍ തട്ടിയുറക്കുന്ന സ്വാന്ത്വനവും
സ്നേഹത്തിന്‍ ചന്ദന ശീതളതയും
നേര്‍മയും നന്മയും അമ്മയല്ലേ
അകലെ കാണാദൂരത്ത് പോയോളിച്ചാലും
അഗതിമന്ദിരത്തിന്‍ ഇരുട്ടില്‍ തളച്ചാലും
അനുഗ്രഹ ദീപം തെളിക്കുന്ന നന്മയല്ലേ
അമ്മക്ക് മക്കളെന്നും ഉണ്ണിയല്ലേ
ആറ്റുനോറ്റുണ്ടായ  ഉണ്ണിയല്ലേ
ആശിച്ചു പോറ്റിയ പൈതലല്ലേ
അട്ടത്തും താഴത്തും വെക്കാതെ
അമ്മ വളര്‍ത്തിയ ഉണ്ണിയല്ലേ
ഉണ്ണി വളര്‍ന്നു വലിയോരല്‍മരമായാലും
ഉത്തുംഗശൃംഗത്തില്‍ നീ എത്തിയാലും
ഉറക്കമിളച്ച് ഊട്ടിയുറക്കിയ അമ്മയല്ലേ
അമ്മക്ക് ആരോമല്‍ എന്നും ഉണ്ണിയല്ലേ
രമ്യമന്ദിരത്തില്‍ സുഖമായ്‌ വാണാലും
രമിച്ചു ആരാമതല്‍പ്പത്തില്‍ ഉറങ്ങിയാലും
നിന്‍ അമ്മ ഒറ്റക്കു ഇപ്പോള്‍ ഇരുട്ടിലല്ലേ
അഗതിമന്ദിരത്തില്‍ നിന്‍ അമ്മയില്ലേ
വാര്‍ദ്ധക്യം ഒരു ശാപമാണോ
വാഴ്വിന്‍ പരമ സത്യമല്ലോ
വാടിടും വല്ലിതന്‍ തളര്‍ച്ചയല്ലോ
മരണം വാഴ്വിന്‍ വിരാമമല്ലോ
കര്‍ക്കിടകവാവിന്‍ പേമാരിയില്‍
കണ്ണിമയ്ക്കാതെ കാത്തിരുന്നു
കണ്ണന്‍ വരുന്നതും കാത്തിരുന്നു
കാലപാശം മുറുകി മിഴിച്ചിരുന്നു
താരാട്ട്‌ പാടിയ നന്മയിന്ന്‍
തഴുകിത്തലോടിയ കൈകളിന്ന്‍
താങ്ങി കിടത്തുവാന്‍ മക്കളില്ലാത്തെ
തെരുവില്‍ ചേതനയറ്റു മറഞ്ഞിടുന്നു
സ്നേഹിക്കാന്‍ പഠിപ്പിച്ചത് അമ്മയല്ലേ
സ്നേഹവും നന്മയും അമ്മയല്ലേ
നേര്‍വഴി തെളിയിച്ച ദീപമേ
നിത്യശാന്തി നേരുന്നു പരമസത്യമേ
-ജയപ്രകാശ്.ഇ.പി-