കുരുക്ഷേത്രം

കുരുക്ഷേത്രമാണിത് കലിയുഗ കുരുക്ഷേത്രം

കല്‍മ്മഷം പേറുന്ന മനുഷ്യര്‍തന്‍ കുരുക്ഷേത്രം

കര്‍ണ്ണനും അര്‍ജുന്‍മാരും മത്സരിക്കുന്ന

കിരാതമാം ധര്‍മ്മച്യുതിതന്‍ കുരുക്ഷേത്രം

സൌഹൃദങ്ങളില്ലിവിടെ ഉള്ളത് ചതികള്‍ മാത്രം

സത്യങ്ങളില്ലിവിടെ ഉള്ളത് നുണകള്‍ മാത്രം

സാഹോദര്യമില്ലിവിടെ ഉള്ളത് മാത്സര്യം മാത്രം

സ്വപ്നങ്ങളില്ലിവിടെ ഉള്ളത് സ്വാര്‍ത്ഥ മാത്രം

സൌക്യങ്ങളില്ല സുഖങ്ങളില്ല

സൗമ്യതയില്ല സല്ലാപങ്ങളില്ലാ

ശിരസ്സുയര്‍ത്തുവാന്‍ നേരമില്ലാ

ശകുനിമാര്‍ തന്‍ കുതന്ത്രങ്ങള്‍ മാത്രം

വര്‍ണ്ണങ്ങള്‍ തമ്മില്‍ കൊത്തിപ്പറിക്കുന്നു

വണ്ണാനും പറയനും പടികയറുമ്പോള്‍

വര്‍ണ്ണമേല്‍ക്കോയ്മ പെരുവഴിതെണ്ടുന്നു

വര്‍ണ്ണതിമിരത്തിന്‍ ഇതു ബാക്കിപത്രം

ഗാന്ധാരപാഷാണം ഒഴുകിയെത്തുമ്പോള്‍

ഗംഗാതടങ്ങളില്‍ വിഷവിത്തു പാകുന്നു

ഗാന്ധാരിമാര്‍ വാവിട്ടുകരയുമ്പോള്‍

ഗാന്ധാരദേശത്തവര്‍ അട്ടഹസിച്ചു ചിരിക്കുന്നു

തെരുവിലെ തെമ്മാടി ദുശാസനന്‍മാര്‍

തെരുവില്‍ കൃഷ്ണയെ വലിച്ചെറിയുമ്പോള്‍

തിരിഞ്ഞുനോക്കുന്നില്ല അര്‍ജുനന്മാര്‍

തലതിരിഞ്ഞ നീതിപീഠവും മുഖംമറക്കുന്നു

അപരാധസന്തതിമാര്‍ തമ്മില്‍ കലഹിച്ചു

അധികാര സൗധങ്ങള്‍ വെട്ടിപിടിക്കുമ്പോള്‍

അരുതെന്നുരക്കുവാന്‍ മാതൃത്വം അശക്തരാകുന്നു

അഭിമന്യു ചക്രവ്യുഹത്തില്‍ വീണ്ടും ഉഴലുന്നു

മതങ്ങള്‍ തന്‍ ശീതളച്ചായയില്‍

മരതകകൊട്ടാരത്തില്‍ ഇരുന്നവര്‍

മണ്ണിന്‍ മക്കളെ കുരുതി കൊടുക്കുന്നു

മനുഷ്യന്‍ മൃഗങ്ങളായ്‌ മാറുന്നു

ഒരു കോപ്പ ചാരായം മോന്തികുടിക്കുവാന്‍

ഒന്നും മടിക്കാതെ ചെയ്യുന്ന വോട്ടിനാല്‍

ധര്‍മവും നീതിയും മേല്‍ക്കുമേല്‍ തോല്‍കുന്നു

കലിയുഗ കുരുക്ഷേത്രയുദ്ധം തുടരുന്നു

ജയപ്രകാശ്‌ ഇ.പി